COLLOQUIO MUTO AI GIARDINI .( A VERONA )

Son sentà ai giardini con el can.Fumo na cica e guardo passar la gente.Passa na gnoca sui trenta.Non so gnanca come la fassa a caminar su quei tachi da vinti schei.Spale nude,gambe longhe e peto fora .Ociai da sol de gran moda ,na grinta da grima,tatuaggio come i galeoti su la caucia.Che moda ,adesso penso,ste done.Non le ghà più remission de niente.La guardo e la me guarda.Ghe vedo ben i'oci parchè i'ociai la ghe là sula testa.Non so a cosa i serva i'ociai da sol su la testa, penso.Par che la me diga : " Sà vuto vecio?". Vecio intanto dighelo a to pare,anca se podaria essarghe anca mi.Vuto gnanca che te guarda?Ma sito mai sta dal becar?Alora vaghe!Seto sa el fa el becar?Par i clienti,par tirarli nel rocolo,el mete in vetrina i tochi de cicia più bei.Miga el mete in mostra ossi e carta da incartar! Ti te si, stessa.Te metti in mostra tuto quel che te ghè de meio,e vuto che non te guarda?Arda che i'oci ghe i'ho ancora boni setto?Guarda che non gò mia perso la memoria ancora de come iè fate le done.Te l'ho ditto che non son ancora così vecio.Le ti che te fe la becara e te meti in vetrina la mercansia e non te vol che i te guarda.Te lo fe a posta!Ma non sta a credar d'essar ci sa ci!Credito d'essar la principessa TAITU'? Sto pensando invesse che me parì tute stesse oramai.Volì tutte essar gamade.e dopo fasì finta de essar santificetur nomen tuum.Date na calmada Nina.Te guardo parchè me par impossibile che le done sia così cambiade ancò! Gnanca un poco de pudor.Ma sa credio de far.Se si bele se vede lo stesso,sensa bisogno de metar tuto in mostra.Se si brute,non l'è fasendo vedar el cul par la strada che cambì.Guardì che la sorpresa l'è sempre incartada,se no,che sorpresa ela!La par averme sentì quel che penso.La sbassa i'oci e la passa.Mi seito fumar e la guardo passar.Che tempi fioi,che tempi insulsi.Le crede de valutarse mostrando le belesse e basta.Ma sio bone almanco de far le paparele e de tacar un boton?Guardì che el Morbin el passa,ma bisogna sempre magnar e vestirse.Ricordevelo!