Le distruzioni operate dai politici.

Oh come semo stà fortunadi noialtri bociasse dei ani 5o e primi 6o!Gaveino la campagna a un tiro de sciopo.Le toresele da una parte,la campagna da l'altra.Ve ricordio Lungadige Galtarossa?Con el so arzare,le so bele albare.Tutte tajade parchè Sboarina l'ha voludo slargar la strada.Che non la serve a un casso,parchè al Ponte San Francesco la torna come l'era prima!Eco,proprio li a Porta Vittoria,se sentia sà odor de campagna.Andar al BOSCHETO e far tuto el giro fin al Porto l'era una gita in campagna.Andar a far el bagno al Boscheto,fra el canel de pagadebiti.Che belo. Con el salvagente de camara d'aria piena de pesse.E l'ISOLA dei CARABINIERI,ve la ricordio?Anca alora ghera el manegio,pai Caramba però.Non come adesso che el ghe par i siori.I siori che sta in centro e vol averghe el caval.Anca alora ghera ci gavea el caval.Si,ma par tirar el careto,non par far i cagoni.Ghera ancora i barconi su l'Adese alora,de quei che andava a pescar col balanson,par ciaparse un franco.Passado el Ponte de la ferovia,s'era nel regno de l'Adese.Se caminava fin al ponte del Porto,pena fato,parchè prima ghera el tragheto.Pasada la diga,se svoltava a sinistra e se rivava dedrio la ciesa del Porto.Dopo se traversava le rotaie,soto tera,dal BUSO DEL GATO e se arrivava al piassal de la stassion.Che giro butei,che belo,quanti usei se vedea e quante rane.Adesso?Un ostia.Adesso non se pol più dir "vao in campagna",parchè non la ghe più.Case e case dapartuto.Anca sul lungadige Galtarossa.Prima ghera solo el pierar sul canton e l'ostaria col sugo de le bocie.Dopo campi.Galtarossa l'era quasi sconto,solo la vecia palassina in fondo.Adesso l'AGSM,la POLISSIA jà ciapà el posto dei campi.Ma non podeele mia restar dove iera?Ghe volea proprio quei sacranoni de palassi li?Non gaveino mia prima luce,aqua ,gas e polissia,anca quando iera dentro le porte?E no,come faseili se no a spendar schei!Tuti schei spesi par niente.Le albare po,che fastidio daseele?Le albare che iera sempre teniude d'ocio par i fonghi.Quei de albara!I gavea la posta ci se ne intendea,e dopo iandava a vendarli in Piassa Erbe.Non jè mia bale!Ani 60 butei !Adesso par andar in campagna sa bisogna far?Niente ,star a casa,parchè campagna non ghe n'è più quasi e quela poca che ghè l'è serada! Ma non i me crede mia i butei de ancò quando conto ste robe.I me domanda se son nato nel MEDIO EVO!I capisso,parchè non jà fato ora vedar niente,poareti.Adesso i vede solo case e capanoni,sfalto e machine che core.I cavai?Solo quei dei quatro che ga carta da spendar al manegio!